Andeby Online > Nyhende > Ingen Harvey Awards til donaldistane
Mange nominasjonar til tross; ingen Disney-skaparar klarte å kapre premieplass i utdelinga av årets Harvey Awards.
Som vi har skrive om tidlegare, fekk Don Rosa seks nominasjonar til årets Harvey Awards, medan William Van Horn fekk tre. Prisane blei delt ut på Baltimore Comic-Con 8. september i år, og verken Rosa, Van Horn eller andre Disney-relaterte personar eller bedrifter fekk prisar i år.
Både Rosa og Van Horn var nominerte i tre av dei gjevaste kategoriane, men måtte sjå seg slått. I kategorien «Best writer» var det Ed Brubaker som mottok prisen for sine Daredevil-seriar, Frank Quitely vann «Best artist» for sitt arbeid med All-Star Superman, og «Best Cartoonist»-prisen gjekk til Jaime Hernandez for Love and Rockets.
Rosa var dessutan nominert for «Best cover artist», som blei vunne av James Jean og «Special award for humor in comics», som blei vunne av Bryan Lee O'Malley. Hans The Life and Times of Scrooge McDuck Companion var òg nominert til «Special award for excellence in presentation», men den prisen var det Top Shelfs Lost Girls som mottok.
I tillegg hadde Gemstone og Gemstone-tilsette totalt seks nominasjonar, også desse utan uttelling. Prisen «Best letterer», der både Jon Babcock og Willie Schubert var nominerte, gjekk til Stan Sakai. Prisen «Best colorist», der både Susan Daigle-Leach og Scott Rockwell var nominerte, gjekk til Lark Pien, og dei to prisane Walt Disney's Comics and Stories var nominert til, «Best continuing or limited series» og «Best anthology», gjekk henholdsvis til Marvels Daredevil og Ballantine Books' Flight Vol 3.
Du finn alle resultata på prisens offisielle heimeside, harveyawards.org.
Av Olaf Moriarty Solstrand, lagt til laurdag 15. september 2007
Tilbake til nyheitsoversikta ...
Andeby Online er drive av Olaf Moriarty Solstrand. Alle bilete av Disney-figurar på sidene er © DISNEY og brukt i samsvar med norsk åndsverkslov.
