Andeby Online > Nyhende > Don Rosa Eisner-nominert
Don Rosas serie «The Black Knight glorps again», utgitt i Uncle Scrooge #354, er nominert til ein Eisner-pris i kategorien «Best short story».
Serien «The Black Knight glorps again» blei utgitt på norsk i Donald Duck & Co 27-28/2004 og omhandlar den skrekkelege gjenkomsten til Den Sorte Ridder, skurken som ønskjer å oppløyse heile Skrue McDucks formue med ein rustning innsmurt med eit superløysemiddel. Den amerikanske utgåva av historia kom i mai i fjor.
The Eisner Award reknast for å vera teikneseriebransjens Oscar-pris. Rosa har tidlegare fått prisen for serien om Skrues liv, og både Barks og Gottfredson er innlemma i The Eisner Award Hall of Fame. Ingen andre Disney-relaterte seriar er nominerte i år.
Konkurransen om prisen er sjølvsagt som alltid hard: No må Don Rosa konkurrere mot Gabrielle Bells «Felix» (Drawn & Quarterly Showcase 4), Bill Willinghams og James Jeans «A frog's eye view» (Fables: 1001 Nights of Snowfall), Tony Cliffs «Old oak trees» (Flight 3), Stan Lees, Oliver Coipels og Mark Morales' «Stan Lee meets Spider-Man» (Stan Lee meets Spider-Man) og Eric Powells «Willie: Portrait of a groundskeeper» (Bart Simpson's treehouse of horror #12).
Årets jury består av Robin Brenner, Whitney Matheson, Christopher P. Reilly, James Sime og Jeff VanderMeer. Du kan lese meir om årets Eisner-pris på prisens heimesider.
Av Olaf Moriarty Solstrand, lagt til torsdag 19. april 2007
Tilbake til nyheitsoversikta ...
Andeby Online er drive av Olaf Moriarty Solstrand. Alle bilete av Disney-figurar på sidene er © DISNEY og brukt i samsvar med norsk åndsverkslov.
